وإنت في المصيف

ولأن جمالك يهمّنا في كل الأوقات وفي أي مكان يبقى أكيد لازم نقول لك شوية النصائح دي علشان تحافظي على جمالك وعلى بشرتك وإنت في المصيف..

ما تستغربيش قوي كده من كلامي؛ لأن مش قصدي بلاش نزول الميه خالص، لأ قصدي إنك ما تنزليش في الفترة من الساعة 11 إلى الساعة 5؛ لأن الشمس في الوقت ده بتكون مضرة جدّا على الجلد وممكن تحرق جلدك..

طبعا هتقولي: طيب أنزل وأستخدم كريم واقي من أشعة الشمس هاقول لك: برضه بلاش لو عايزة تنزلي يبقى يا ريت تنزلي الصبح بدري من الساعة 6 إلى الساعة 10 أو العصر الساعة 5؛ لأن الوقت ده بيبقى الجو حلو وبتكون أشعة الشمس مش مضرة، وفي نفس الوقت الشاطئ بيكون هادي ومفيش فيه ناس كتير وتقدري تستمتعي بالميه براحتك، وبكده يبقى أنت ضربتي أكتر من عصفور بحجر واحد؛ حافظتي على بشرتك واستمتعي بالميه..

دي دايما النصيحة اللي بنقولها لك سواء كنت في مصر أو في مصيف ادهني بشرتك بكريم الوقاية علشان تحمي بشرتك من أشعة الشمس وعلشان جلدك ما يتعرضش لأشعة الشمس المباشرة.

طبعا هتقولي: طيب لو قاعدة في البلكونة أو تحت الشمسية برضه أستخدمه؟ هاقول لك: آه برضه استخدميه؛ وده لأن الجلوس تحت الشمسية ممكن يضر بشرتك وده علشان الميه والرمل بيعكسوا أشعة الشمس على بشرتك، وبكده بتلاقي نفسك محتاجة تستخدمي برضه واقي للشمس ونفس الشيء لو قاعدة في البلكونة.

فيه سؤال دايما بيجي لنا من بنات كتير بتعاني من إن ماكياجهم بيسيح وهم قاعدين على البلاج فمثلا بتلاقي الكحل ساح تحت العين وكل حاجة اتبهدلت... وعلاج المشكلة دي إنك ما تحطيش ماكياج وإنت على البلاج؛ وده لأنك مهما تعملي الرطوبة والشمس هتخلي الماكياج يسيح ويبهدل وشّك، وعلشان كده خلي الكام يوم بتوع المصيف دول فرصة إن بشرتك ترتاح من الماكياج واستبدلي ماكياجك بزبدة كاكاو أو مرطب للشفايف وكريم مرطب للبشرة تحطيه بالليل قبل ما تنامي.

اوعي تسمعي كلام أي حد يقول لك إنك علشان تحافظي على بشرتك وأنت على البلاج إنك تستخدمي كريمات تفتيح البشرة وأنت قاعدة على البلاج؛ لأن ببساطة شديدة جدّاً كل كريمات التفتيح دي مضرة جدّاً جدّاً للبشرة؛ وده لأنها بتحتوي على مواد بتتفاعل مع الشمس وممكن -لا قدر الله- تصيبك بسرطان الجلد..

زي ما هتريحي بشرتك من الماكياج وإنت في المصيف إيه رأيك تريحي شعرك هو كمان من السيشوار، طبعا هتقولي: إزاي ده؟ أنا لازم أستخدم السيشوار علشان أفرد شعري، هاقول لك: إنك حتى لو شعرك اتعمل بالسيشوار فده مش هيجيب نتيجة؛ علشان الميه والرطوبة اللي بتكون موجودة في المصيف بتبوّظ الشعر واستخدامك ليه هيخلي شعرك يتقصف أكتر..

ولو عايزة تفردي شعرك فعلا يبقى كل يوم بعد ما تغسليه بالشامبو والبلسم المناسبين تتنشفيه كويس وتدهينه بكريم أو زيت وتلفيه في طاقية لمدة ساعة.

وعلشان تحافظي على شعرك من التقصف والجفاف اللي ممكن تتعرضي لهم من تأثير الميه المالحة والرطوبة يبقى يا ريت تحرصي على إنك تستخدمي الشامبو والبلسم المناسبين لنوع شعرك كل مرة تغسلي فيها شعرك.

ودي آخر نصيحة عايزة أقولها لك وهي إنك تحافظي على جمال ونظافة البلاج، وبلاش ترمي كل حاجة على الأرض وتقولي ما هم هيشيلوها؛ لأن نظافة البلاج دي مسئولة منك إنت مش من حد تاني علشان كده خلي معاكي كيس بلاستيك حطي فيه كل حاجة إنت مش عايزاها وآخر اليوم وإنت قايمة شوفي أقرب سلة مهملات وارميها فيها أعتقد إن الحل ده هيكون أحسن من إنك ترمي كل حاجة على الأرض.