شويه اسئله رجالى........

اولا: ليه بتفرح لما حد بيقول الرجل طفل كبير؟ بقى بذمتك مش مكسوف لما تبقى شحط قد الباب صوتك يفزع الميتين وتقول لخطيبتك او مراتك عامليني زي اطيب يا سخطة اقعد جنب مامي يا ننوس عين مامي لحد ما تكبر وتبقى راجل


ثانيا: انت ليه متصور ان شغلتك في الدنيا انك تبصبص للبنات؟ ولو ما عملتش كده يتهيألك انك اقل من صحابك؟ مش حرام عليك؟


ثالثا: ليه لما تبقى مؤدب ومتربي ومش صايع وعمرك ما جربت المخدرات ولا عملت حاجة حرام تبقى مكسوف من نفسك ,وتحكى مع صحابك وتحكي عن تجارب عمرك في حياتك ما عملتها؟ هو مين اللي مفروض يتكسف اللي بيعمل حاجة غلط وللا اللي بيعمل حاجة صح؟


رابعا: انت ليه متأثر بالافلام المصرية الفاشلة؟ يعني بتعتبر ان قصة الحب هي الفيلم والجواز هو نهاية الفيلم، خلاص بقى، ضحكنا كتير هزرنا كتير قلنا كلام حلو كتير واتجوزنا...مش ح نقضي العمر كله في الكلام الفارغ ده ورانا مهمات عظام: ورانا ننكد على ام الولية دي، ونكشر في وشها، ونكبتها، ونقرفها، ونحطم معناوياتها، ونتفرج على الماتش، ونقعد مع صحابنا في القهوة...ونعاكس ستات تانية بقى..هو انا ح اعاكس مراتي؟


خامسا: ليه بتتعامل مع الستات على انهم سؤال في امتحان: جاوبنا السؤال ده واتجوزناه نجاوب على السؤال التاني بقى؟ من غير جواز طبعا عشان مش عايزين مشاكل...بس لو ينفع في السر يبقى خير، ومش مهم مراتك تبقى قاعدة زي القرطاس في البيت ومش مهم التانية تبقى بتعاملها على انها عشيقة وهي زوجة...ليه تدفع اكتر لما ممكن تدفع اقل؟


سادسا: لما مراتك بتكلمك وانت بتاكل او بتتفرج على الماتش مش بترد ليه؟ ما هو يا اما سامعها ومطنش وده معناه انك قليل الذوق يا اما مش سامعها تبقى ندهتك النداهة يا عبد الرحيم


سابعا: ليه بتتهم مراتك بالتفاهة عشان بتكلمك عن مشاعرها والحاجات اللي تاعباها في حياتها؟ وهو الكلام مع صحابك عن ابو تريكة وحسني عبد ربه مش تفاهة؟ والكلام عن احدث عربية نزلت مش تفاهة؟ (نفسي اعرف سر ولع الرجالة بالعربيات) وكلامك مع صحابك عن كذا كذا وانت فاهم انا اقصد ايه وربنا حليم ستار مش تفاهة؟ يعني انت بتقعد على القهوة تحل قضية فلسطين يا خي؟


ثامنا: ليه بتستسهل تخوض في عرض نوعين من الستات: واحدة عاجبك ومش مدياك ريق وواحدة كان بينك وبينها علاقة وسبتها وغالبا بتبقى ظلمتها؟ الاولانية مالهاش ذنب ان ربنا خلقها حلوة وعجبتك والحب مش بالعافية يا اخي، والتانية اي كلام ح تقوله على اخلاقها ح ينطبق عليك بالظبط لانك شريكها في كل حاجة، وللا انت فاكر نفسك معمل لاختبار اخلاق النساء؟


تاسعا: ليه بتعرف تخلي الستات تحبك ومش بتعرف تحتفظ بحبهم؟ وللا انت مش عارفة ان اغلبية الستات عايشين عشان الولاد وعشان مش عايزين طلاق ووجع دماغ وانها ما بقتش تحبك خلاص؟ شكلك ايه قدام نفسك؟


عاشرا: ليه متصور انك مهما تهمل في مراتك ح ترجع تلاقيها بحطة ايدك؟ ما تقوليش انا مراتي ست اخلاقها زي الفل وانا منقيها على الفرازة...ما تنساش ان فيه صحابية زنت ايام الرسول،

ح يجرا لك ايه يا اخي لما تقول كلمة حلوة وللا طبطبة وللا شكرا وللا تسلم ايدك وللا تعبتك معايا وللا ايه الشياكة دي وللا تجيب لها هدية حلوة من غير مناسبة وللا تنشر كام حتة غسيل وللا تقعد مع العيال ساعة وللا لما توصل الشغل تتصل بيها تطمن عليها وللا قبل ما تنزل من الشغل تتصل تقول لها مش عايزة حاجة وللا تغسل كام طبق وترحمها من الساقية اللي هي بتدور فيها يا اخي انت ايه جبلة؟

ده انت لو جايب جاموسة في البيت كانت بركت منك، ح يجرا لك ايه لو تقعد تسمعها شوية وللا تسألها عملتي ايه في الشغل النهاردة وللا تقول لها نكتة لطيفة تضحكها وللا تضحك على استظرافها حتى لو كان بايخ، وللا تقول لها بحبك؟ يعني راح فين الكلام اللي كنت بتقوله ايام الخطوبة؟ ليه تعطشها لحد ما تكتئب وتتخن وتفشكل وتبوز وترجع تزعل وتروح تبص برة؟ حتى اشتري نفسك من نكدها يا اخي بكام كلمة حلوة، مين قال لك انك لما تفضل تعاملها كده مش ح تنفجر في وشك وتلبسك حلة فيها الاكل بيغلي زي واحدة فعلا عملت كده؟ مين قال لك انها وانت راميها زي الكرسي في البيت مش ممكن تضعف، مهما كانت اخلاقها ودينها، قدام كلام معسول لراجل شايف فيها الاكتئاب وعايز يقرصن عليها؟ مين قال لك انها اصلا ما ضعفتش من وراك ورجعت عشان العيال وانت ولا دريان عشان بتتفرج على الماتش وبتلعب طاولة على القهوة وبتتكلم عن العربيات و الستات اللي في الشارع مع صحابك وعن ....


حادي عشر: انت ليه بتتهرب من مواجهة اخطاءك؟ ليه مش حسيس كده ولما تغلط تعرف من نفسك انك جرحت اللي قدامك ليه تضطرها تبوز في وشك وياريتك بتعترف بغلطك الا بتعمل بهلول وتفضل تقول لها مالك مالك؟ انت بتستعبط ما انت عارف انت عامل ايه؟ وليه لما بتسعبط لحد ما تضطرها تواجهك وتفرقع في وشك تبجح وتهبل عشان تغطي على غلطك؟ انت مش شايف انك كبرت على التصرفات دي؟ انت راجل..رااااجل...راااااااااااااااجل
من الرجولة انك لما تغلط تقول انا اسف وما تكررش غلطك


ثاني عشر: ليه لما بتقابل ست مخها على قدها بتتريق عليها ولما تقابل ست ذكية تبقى بتهري وتنكت في نفسك وكل املك انك تصطاد لها غلطة عشان تسفهها؟


ثالث عشر: ليه لما بتقابل ست ضعيفة بتديها على قفاها ولما بتقابل ست قوية تحطها في دماغك وراسك والف جزمة قديمة لتجيب مناخيرها الارض؟


رابع عشر: ليه وانت بتخطب وفاكر نفسك النجم ومناخيرك المعووجة من حقك تقعد وتختار تتجوز واحدة شبه نانسي عجرم في الشكل وزي رابعة العدوية في الاخلاق؟ مش تبص لسنك وظروفك وامكانياتك قبل ما تقعد على البساط وتاخد ست البنات؟ ماما اللي قالت لك كده صح؟

خامس عشر: مين اللي فهمك انك اكيد بتفهم احسن من كل الستات وان كلامك درر وحكم؟ ماما صح؟


سادس عشر: مين اللي قال لك ان الراجل ما يعيبوش حاجة ابدا لا سن ولا ظرف اجتماعي ولا فلوس ولا اي حاجة ده انت اي بنت تتمناك؟ ماما صح؟ (مرة جبت عروسة لواحد كان عنده اربعين سنة ومطلق وهي كان عندها واحد وتلاتين سنة انسة وبالرغم اني كنت مستخسراها فيها الا ان هو اللي رفض وقال لي كبيرة!!!!! مع انه كان اقرع وبكرش)


سابع عشر: انت ليه اناني ومش بتفكر غير في نفسك وراحتك وبس؟ ماما هي اللي خلتك كده صح؟ كنت بترجع ترمي الهدوم وماما تقول لك اتعشيت تقول لها عندك ايه تقول لك مكرونة وفراخ بانيه فتلوي شفتك وتقول لها خلاص انا مش جعان فتقول لك طيب احمر لك بطاطس؟ اعمل لك سندوتش؟ اطلب لك من السوبر ماركت لانشون؟ اعملك لك بيتزا (الساعة اتناشر بالليل عايزة تعمل له بيتزا)؟ ولما تبقى بتذاكر انت واختك تقول لها قومي اعملي لاخوكي شاي...صح؟ بس دي ماما يا حبيب ماما...مش مطلوب من مراتك انها تقوم بنفس الدور...عشان انت كبرت خلاص بص في المراية يا دلوع ماما ..او اقول لك سجل صوتك على كاسيت، بقى ده صوت عيل ده؟


ثامن عشر: انت ليه لما بتخطب واحدة اول حاجة بتقولها: انا يهمني في الانسانة اللي ح اتجوزها انها تكون كذا كذا وانا باحب كذا وباكره كذا...وعمرك ما بتسألها انت عايزة ايه ولا بتحبي ايه ولا بتكرهي ايه؟ ومين فهمك انك عملت فيها جميلة انك اتجوزتها وان مهمتها الاولى والاخيرة انها تحافظ على النعمة اللي هي سيادتك؟ ماما صح؟

بصراحه الموضوع عجبنى ونقلته
فى لسه حابيين اكمل ولا لا؟
بس فكلا الحالتين انا بعتذر على الالفاظ مع انى محيت وغيرت معظهما بس اللى فيه العادات دى يستاهل الكلام دة وعلى الله يجيب فايدة مش يبقى كلام وخلاص ولا انتو رايكم اييييييييييييه؟

على فكره هو الموضوع هايل بس هايزعل ناس كتير اوى منك وممكن ناس تتعظ وتفهم ان ده ابسط حاجه للزوجه او الحبيبه ومننكرش ان فى رجاله كتير كويسين وبيراعى بيتهم كويس
شكرااا على موضوعك

انا عارفه يا انجل ان للاسف فى ناس كتير هتزعل بس هتزعل عشان اكيد حاسه انى بكشفهم بالكلام دة
يا ريت كل واحد يعرف اللى ليه واللى عليه وان كمان تدين تدان
ولازم نراعى ربنا فاللى بنحبهم ميرسى ليكى سوسو على ردك

السلام عليكم
موضوع قوى جدا واسئله صعبه للرجال واسئله تتحط على جروح الرجال وتفوق الرجال المتزوجين والمحبين

فعلا كلامك صح
استنوا ان شاء الله الجزء اللى بعد كدة وربنا يستر